Ellixe idioma pa navegare:

ALLUCHES OU LLUCHA LLIONESA

  • La llucha llionesa, de posible orixe celta, yá se citaba nel s. I e.C cumu dalgu típicu de ciertos pueblos del norte la península.
    La llucha llionesa chamada "alluches" consiste en derribare al sou oponente cimeiramente d'espaldas teniendu las manos engarradas permanentemente al cintu del contrariu. Pa eillu emplegarán una riestra de téunicas ou "mañas" queyes permitirán derribare al sou oponente, nun pudiendu continuare la llucha nel suelu.
    El llugar onde se desenrrolla la llucha chamase "corru" y tradicionalmente suel sere un práu (anguañu tamién se desendolcan sobru tapices) círcular d' ente 8 y 12 m. de diámetru.
    Anguañu prauticanse dous lligas: la lliga d'hibiernu y la lliga de branu. La lliga d'hibiernu ye pur equipos (esisten siete equipos y tres escuelas municipales). La lliga de branu ye individual y tién cuatru estayas: llixeros (-68), medianos (-78), mediupesaos (-88) y pesaos (+88). Tamién pa los neños que quieran participare nesti deporte autóutonu hai una lliga nomada lliga de base y que se divide n'estayas pur edá y pesu.
    La vestimenta ta formada pur camisa, pantalón curtíu y un cinturón de cueru d'unos 3 cm d'anchu sobru'l que se face l'engarre.
    Los combates finan algamandu ún los contendientes 4 puntos ou al trascurrire 2 minutos dende l'entamu el mesmu, venciendu nesti casu el que más puntos tenga ou nel casu d'empate'l de mayor ñiciativa a criteriu del árbitru. Las puntuaciones vienen consideradas pur:
    -Cayídas enteiras (2 puntos), el lluchador derribáu fai contautu cul suelu cuna espalda ou sofita'l sou hombru pula parte posterior.
    -Medias cayídas (1 puntu), cuandu contauta cul suelu de cualisquier outru xeitu ou suelta'l cinturón ensin asentimientu del árbitru.

    Esistienun outras lluchas, anguañu en desusu, que paecen tenere'l sou orixe na llucha llionesa y que fonun trasmitidas pulos pastores na trashumancia: Llucha de la Cruz en Salamanca, vueltas ou marañas en Muga de Sayagu, lluchas ou trinchas en Zamora, valtu nel conceyu la Llomba en Llión) y altíu ou alluchas en La Cepeda.
    Van bien d'años que la llucha llionesa trata d'organizare la sua propia Federación, ensín inxerencias esternas.