Ellixe idioma:

Bárbaros y musulmanes



  • San Pedru la Nave (Zamora), arte visigóticu

  • Las primeiras invasiones de los pueblos bárbaros entaman a partire los entamos del sieglu V. Éstos pueblos son:
    Los suevos, d'orixe centrueuropéu, posiblemente de l'autual Poloña. La parte norte de l'autual País Llïonés fou una zona vital pa esti pueblu y el sou asentamientu eiquí duróu dalgu más de sieglu y mediu. Nun entamu fuenun mui violentos, estruyendu, pur exemplu, Llancia, qu'enxamás tornóu a edificase.
    Los alanos, d'orixe asiáticu.  Mui poucos d'eillos permanecerían nel nuesu territoriu, s'asentanun na parte meridional la península.
    Los vándalos asdingos, d'orixe centrueuropéu, posiblemente del sur de l'autual Polonia.  Obligaos pulos godos, abandonan el sou asentamientu davezu y recourren la mayor parte de l'Europa ocidental ata asentase al sur la península hispánica.  Postreiramente invaden la práutica totalidá del autual territoriu llïonés faciendu retrocedere tantu a suevos cumu a visigodos.  Finalmente fonun refugaos, inda de la propia península y obligaos a asentase nel norte d'África, fundandu el Reinu africanu los Vándalos.
    Los godos ou visigodos, d'orixe escandinavu. Organizanun cultivos nas quintas romanas y lleganunos el sou códigu de lleis, el “Códigu d'Euricu”, que sedrá base ou llibru llegal del reinu llïonés medieval.  A eillos debemos tamién el primer monumentu d'una granible categoría artística calteníu nel nuesu territoriu, “San Pedru la Nave”, en Zamora.
    Los visigodos dividienun l'autual País Llïonés nas provincias de: Asturia (territoriu los astures), Aurariola (territoriu los godos, dende Villalpandu a Cartaxena) y Lusitania (territoriu los vettones y lusitanos).

    Los vitizianos allinunse cunos musulmanes, albidrandu qu'éstos, vencíu el sou oponente don Rodrigu, tornaríanyes la corona. Peru nun fou d'esti xeitu, pues los recién chegaos repartense'l territoriu. Al norte'l Dueru s'allugan los bereberes, procedentes del norte d'África. Al sur, los árabes, exipcios y sirios, al sou mandu Muza qu'entra en Salamanca en 712. La resistencia fou práuticamente nula al sere la mayoría vitizianos, nun habiendu matanzas nin estruciones. Tan sólu Benavente y Valderas son tomadas al asaltu. Sólu dalgunos godos y los astures organizanun la sua resistencia nas montañas cantábricas. Las secuelas de la gerra civil goda durarán inda muitos años. La oficialidá, pur embargu, sedrá musulmana y lu sigirá siendu durante dalgún tiempu más.
    Cunos musulmanes el territoriu l'autual País Llïonés pasa a formare parte de la rexón nominada "El Mereda", cun capital en Mérida. L'autonomía de Legio fou respetada pulos ocupantes, al empar qu'el restu las ciudaes esceutu las tomadas al asaltu.