Ellixe idioma:

Lluchas escontra Roma



  • Restos las termas romanas d'Astorga

  • Pa finare cuna conquista la península hispánica, Roma debía tomare los territorios ocupaos pulas desemeyadas tribus celtas del Noruesti. Lúculu algama facese cun Intercatia, ciudá vaccea, pula diplomacia y xúnese a esta allianza Helmántica, capital los vettones. Pur embargu, deillos años dimpués, 151 e.C., el pretor Galba provoca una matancia en Ocellum (l'autual Zamora) lu que desendolca'l llevantamientu la ciudá d'Ocile (Fermoselle) y cun él la fegura del caudillu lusitanu Viriatu ou Várate, quien de manu cuna gerra de gerrillas y, dispués en campu abiertu, algama vencere sucesivamente a ouchu cónsules unviaos pur Roma (Vetiliu, Planciu, Unimanu, Nixidiu, Leliu, Quinciu, Servilianu y Cepión) mediante la xunión de vettones y lusitanos.
    Viriatu fou asesináu pur unos celtíberos embaucaos pur Roma, lu que supón l'axebra de los celtas y la ocupación romana de los sous territorios. Peru inda quedaban cántabros y astures. Los sigientes en cayere fonun los cántabros; vencíu el sou exércitu, el caudillu cántabru Arrenu ye crucificáu y los cabeiros vadinienses resistienun en Vérxida. Invaden postreiramente los romanos el territoriu astur pul Norte del Esla, la llucha ye encarnizada peru tamién son vencíos, los cabeiros astures s'abellugan en Llancia. La toma de Llancia pon el puntu y final a la nominada "batalla del Esla" que duróu más de veinti años y que pusu a la totalidá del territoriu llïonés baixu el domiñu de Roma. Pa poder finare la conquista ata'l propiu emperador Augustu tuvu de participare nestos feichos. Nun fou la conquista d' Hispania lu que chevóuye 200 años a los exércitos romanos, sinón la conquista de los territorios vettones, astures y cántabros, ye dicire, el territoriu del autual País Llïonés. Cumu pueblu invasor, los romanos trayenun confusión moral y social, que'l pueblu prellïonés nun paez fouse capaz d'asimilare dafeichu. La romanización nun fou más que superficial y estu lu preba'l feichu de que la cantidá de vezos anteriores a eillos caltenidos guei ye importante. Pur embargu, la sua influyencia sí lu fou, pula asimilación del idioma y los xeitos de llexislase y governase dimpués.

    Alministrativamente los romanos respetanun l'estáu racial anterior peru adautándolu a las suas necesidaes estratéxicas y d'abastecimientu a la metrópoli. La primeira distribución efeutiva, del añu 7 e.C., separta l'autual País Llïonés ente las provincias de la Lusitania (cun capital en Emérita Augusta), dende'l Dueru p'hacia'l Sur, y la Tarraconense (cun capital en Tarraco), dende'l Dueru p'hacia'l Norte y l'Esti. Creyan, dispués, el Conventu Asturicense (cun capital en Astúrica Augusta) pa separtare los territorios astures de los vacceos.