Ellixe idioma:

Llunes d'auguas

  • El Llunes d'auguas cellebrase'l llunes sigiente al de Pascua. N'esti día la xente aconceyase nel campu ou nas biescas pa degustare'l tradicional fornazu, una gran empanada rechena d'embutíu y guevu cocíu. Ye una fiesta tradicional la capital salmantina, anque cul pasu del tiempu, se fuera estendiendu a cuasi la totalidá la provincia salmantina y a mueitas outras llocalidaes de la parte sur la provincia de Zamora.
    L' orixe d'esta fiesta popular remontase al sieglu XVI, cuandu el rei Felipe II dita unas ordenanzas sigún las cuales las muyeres públicas, qu'habitaban na Cá de Mancebía de Salamanca, debían sere trasladadas, durante la Cuaresma, fora la ciudá. A partire del Miércoles de Ceniza, las prostitutas abandonaban la sua residencia davezu y yeran trasladadas al outru lláu del ríu Tormes. El responsable y encargáu de vixilare, cuidare y atendere a las prostitutas yera el “Pái Putas”. Esti presonax (convertíu eufemísticamente nel Pái Llucas, el cabezudu más famosu persigidor los rapaces nos días las fiestas salmantinas) acompangaba los estudiantes a recouyere del sou esiliu a las prostitutas, siempres el llunes sigiente al de Pascua (Llunes d'auguas).

El fornazu

  • Ye una empanada de farina de trigu, atestada de produtos típicos de Salamanca (llombu adobáu, xamón y chourizu), d'un color doráu y adornáu cun una malla romboidal de la mesma masa.
    El fornazu de Salamanca debe tenere un purcentax mínimu d'atestáu del 40% cun respeutu al total del pesu del fornazu. Tamién tan establecios los purcentaxes mínimos de los componentes de l'atestáu cumu son el llombu adobáu, chourizu, xamón ou paleta y guevu duru. Amás deben de tenere forma reutangular ou redonda cun pesos comprendios ente 500 g. y 3 Kg.
    Páxina web del fornazu de Salamanca