Ellixe idioma:

País Llïonés, sieglos XIV y XV

  • Estatua de Guzmán "el Bonu" en Llión


    Códice de Zamora


    Estatua de Men Rodríguez de Senabria


    Xuana García, "la Dama d'Arinteru"

  • Cun Fernandu III de Castiella las Cortes de Llión y las de Castiella sigin aconceyánduse separtadamente. Nos tiempos d'Alfonsu X, “el Sabiu”, el predomiñu de lu castellanu face que dalgunos llïoneses entamen de nuevu la rebelión.  Trataseyes cumu a herexes.  Esti rei redauta las lleyes godas pal reinu de Llión y pa Toledu, peru nun pa Castiella.  Favorez la llingua castellana y tamién la gallega, peru posterga la llïonesa; del mesmu móu favorez la economía de Castiella.  Dende 1273, la llana ye comercializada esclusivamente'n Burgos y ye transportada p'hacia Europa pur marinos bascos.  Los conceyos llïoneses entaman a perder privilexos y a despoblase, otorgánduse nel autual País Llïonés más dominios feudales a nobles y a eclesiásticos, onde antes había conceyos d'homes llibres.  En 1274 cellebranse Cortes en Zamora, ochu pul reinu de Llión y seis pur Estremadura, de los que tres castellanos y cuatru llïoneses dirían siempres cul rei, y outros tres llïoneses conocerían los fueros pa xulgar a los non castellanos, ye dicire, a los pertenecientes a la corona llïonesa, a los de Toledu y a los andaluces.  Sigi Castiella gozandu de los sous xueces, mentantu el Reinu de Llión pierde los notarios de siéu. Enantias la muerte del rei, qu'había tentáu coronase emperador del Sacru Imperio, sobruvién un pleitu sucesoriu.  Españan nuevas rebeliones en Zamora, en Toru y en Safagún, que Don Xuan, hermanu del rei, sofouca pul sou métodu infalible; secuestrare y amanazare de muerte a los fiyos los rebeldes, nesti casu de Teresa Gómez, muyer alcalde de Zamora, que finalmente cede.  Peru años dispués Guzmán “el Bonu” nun lu face.  El príncipe fina triunfandu sobru'l sou pái, teniendu Alfonsu que pidire'l sofitu de Marruecos, venciendu a los llïoneses sublevaos y abellugánduse cumu outras vueltas éstos en Zamora, onde'l príncipe Sanchu afita una corte, separtada de la del sou pái.
    Sanchu IV de Castiella aconceya una vuelta más tol territoriu de la chamada “corona de Castiella” a la muerte del sou pái, anque los llïoneses recuperan dalgunos los sous privilexos, recouyidos nel “Códice de Zamora”.  A esta ciudá favorez Sanchu abondamente, fundandu la eigrexa la Hiniesta y residiendu mui frecuentemente n'eilla.  A la sua muerte, exerce la rexencia la sua viuda, Maríya de Molina, españandu nuevas deferencias ente llïoneses y castellanos.
    El príncipe Don Xuan muevese agora en favor de Llión, fortificánduse en Valencia de Don Xuan (Coyanza), sofitáu pulos pertueses, gallegos y aragoneses, mientras los nobles Haru y Lara fomentan tamién la rebelión axebriega de Castiella.  Pulos “enllaces d'Alcañices”, en 1297, Maríya de Molina algama el sofitu a la sua causa de llïoneses y pertueses.  Pur embargu, a puntu tá de sere coronáu rei en Llïón Don Xuan, pula xunión los conceyos de Benavente, Zamora y Villalpandu.
    En 1301, baixu Fernandu IV, s'aconceyan cortes en Zamora, quedandi ensin deliberación nel conceyu los nobles y prelaos.  Ye'l pasu definitivu p'hacia las “ciudaes-estadu” baiximedievales, d'un corte burgés.  Estu nun supón outra cousa que la sustitución de los reinos pul goviernu provincial, ou de las grandes ciudaes, y la separtación radical ente los conceyos populares, vedaos a la nobleza, y la xerarquía feudal nobiliaria, qu'aumenta las suas posesiones nel campu llïonés. Mediante'l “Conciliu de Salamanca”, los Templarios quedan llibres d'acusación nel País Llïonés.  El Papa revouca esta decisión y tras el “Conciliu de Toru” de 1310, las posesiones d'éstos pasan tamién a los grandes siñores. 
    La minoría d'edá d'Alfonsu XI, nacíu en Salamanca, fou confiada en territorios llÏoneses a Dª. Constanza y D. Xuan, istalándose al rei neñu en Toru. La separtación de territorios y competencias de llïoneses y de castellanos ye bien nidia ya inevitable, debíu a las costantes revueltas.  Se tenta facere de Toru una ciudá neutral, ensin algamalu.  La muerte de los rexentes llïoneses orixinóu una vuelta más desavenencias, alcordándose en 1315 que los alcaldes del País Llïonés s'aconceyaran ca añu en Benavente pur noviembre.  Nel “Conciliu de Zamora”, d'esi mesmo añu, abulinse los privilexos qu'otorgara Alfonsu VIII a los xudíos llïoneses, españandu nuevas revueltas que finaron cul “Alcuerdu de Corrales”, con nuevas prebendas pa la nobleza. El clima de llibertaes y de corporativismu nas istituciones habíase frayáu, y tabase frayandu l'esquema nacional.
    Dende 1325, el rei, mayor d'edá yá, tién conseyeros que organizan la matanza de quienes atizan la rempuesta llïonesa.  Don Xuan ye asesináu en Toru y Osoriu de Villalobos en Valderas, causandu nuevamente la rebelión de ciudaes llïonesas, y tamién, curiosamente, Valladolí, que fou tomada, teniendu el rei qu'esfacese del sou conseyeru Núñez, en Bélver en 1328.  Dous años más tarde produzse la batalla del Saláu, y poucu dispués, las tropas del conceyu de Zamora toman Alxeciras.  S'escribe, en llïonés, la crónica d'Alfonsu XI, que narra estos fechos. Nel sitiu de Xibraltar, en 1350, muere'l rei de peste, que s'estiende pur tola península.
    Pedru I, rei de Castiella, vióuse envueltu en problemas sentimentales, tantu pula parte del sou pái cumu pula propia (Llionor de Guzmán y Maríya de Padilla, dambas muyeres llïonesas) y pa fuliminare las desavenencias cuna sua propia mái y hermanastros, toma Toru, onde s'habían abellugáu, ensañándouse cunos vencios en 1356. El sou hermanu Enrique fou entós reconocíu pur dalgunas ciudaes, peru las llïonesas, en xeneral, caltenienunse fieles a Pedru ata dispués la sua muerte.  Debíu a esta fidelidá y cuna enemistá ente ésti y Enrique, el rei Enrique II sitia Zamora en 1369, acudiendu los pertueses una vuelta más nel sofitu de los llïoneses.  Enrique distribuye beneficios ente los sous alliaos franceses entregándoyes Villalpandu; pur embargu, Zamora nun ye a rindise.
    Alonsu de Texada repite en 1371 la fazaña de Guzmán, tras vere executare a los sous tres fiyos baixu el castiellu de Zamora.  Fina fuyendu a Pertual cunas chaves la ciudá.  Sigin gerreandu dalgunos caballeros llïoneses; Men Rodriguez de Senabria, héroe de la novela del mesmu títulu escrita pur Xil y Carrascu; Fernandu de Castro y Ferrán Alfonsu, ata l'alcuerdu de Llisboa de 1372 pul que ye a creyase'l Ducáu de Benavente, mercándouse una vuelta más a los nobles cun prebendas.
    Nos tiempos de Xuan I españan gerras ente la corona y Pertual, proteixendu el rei Ciarrodrigu y Zamora, tras ser asesinái en Llisboa el cardenal zamoranu Aunes.  Xuan ye vencíu en Alxubarrota, entrandu tropas inglesas pur Alcañices (tamos nel xuegu d'allianzas de la gerra los Cien Años) sitiandu el duque de Lancaster Benavente y, nun pudiéndula tomare, pasa a Valderas.  Los sous habitantes prefirienun incendiala enantias qu'entregase (1387).
    De la minoría d'edá d'Enrique III s'encarganun un rexente pula parte del Reinu de Llión, Ferrán d'Aspariegos, y outru pula de Castiella, amás de los representantes de ca ciudá.  Don Fabrique, duque de Benavente, sublevase orixinandu disturbios en Salamanca, Zamora y Villalpandu, tentandu coronase rei de Llión, pues yera descendiente d'Alfonsu VIII.  Fou vencíu en Roa en 1397.
    Cuasi todas estas gerras, ente 1273 y 1393 fuenun un tentu de secesión llïonesa, amestada cun desemeyadas implicaciones internacionales, sentimentales, de poder, y de toda espelde.
    L'heredeiru d'Enrique nacióu en Toru, y al añu sigiente sucedióuye nel tronu (1406).  Cumu rexente únicu tuvu Fernandu d'Antequera, que dimpués sedría ellexíu rei d'Aragón.  Nesta época, las ciudaes piden que las Cortes de Llión s'aconceyen xuntu cunas de Castiella, peru nun lu facen pur ún tentu de xunión definitiva, sinón pa vexilare mutuamente l'ascensu las outras, pur recelos, envidias y odios; en dalgún casu, los sous representantes cheganun a enfrentase a golpes delantre'l mesmo rei.  Caún quería mayores privilexos y prebendas.  Xuan II tuvu cumu priváu ou conseyero a Álvaru de Lluna. Na s'algamóu en cuantu a pacificación nas Cortes de Toru de 1426, teniénduse que trasladar Xuan II a Zamora pula peste.  En Zamora y Fuentesaúcu, una revuelta, esta vuelta d'orixe relixosu (los Fraticelli, cun Alonsu de Mella a la tiesta) cumplica ata tal puntu la situación que Pedru d'Aragón chegóu a apoderase del Castiellu d'Alba, xuntu a Carbaxales.  La corte de Xuan II, influyida pur estos infantes aragoneses y una pléyade d'escritores, residióu nel palaciu del marqués d'Alcañices, en Toru, asiduamente.
    Nesta época entaman a gueyase nidiamente las influyencias culturales renacentistas italianas.
    Baixu el reináu d'Enrique IV, se sublevan una vuelta más deillas ciudaes llïonesas, esta vuelta pur mor los correxidores, siendu vencíu pul rei el cimeiru istigador, el Duque d'Alba, tamién descendiente de la casa rïal llïonesa.  Pur esti y outros motivos reducese'l númberu de ciudaes cun votu en cortes; tiendese a aumentare'l poder rïal y tantu nobles cumu pueblu en xeneral se rebelan, ye'l prerrenacimientu. La burgesía nun algama el poder que tuviera años atrás, mientras los bandos nobiliarios ditan el sinu del esgoviernu, pur exemplu na batalla de Valdelagallina, en 1472, onde los partidismos amestan reinos, ciudaes y familias.
    Al morrire'l rei, los llïoneses dividense ente partidarios la fiya y partidarios la hermana d'ésti (Xuana “la Beltranexa”, casada cul rei de Pertual, ya Isabel “la Católica”, casada cul d'Aragón).  Toru y Zamora son favorables a Xuana, ñegánduse Isabel a qu'estas ciudaes pasen a Pertual.  Tras la batalla de Peleagonzalu, tómase Toru y róbrase la paz.  Destacan nestos feichos las muyeres llïonesas María Sarmientu, Antonia García y sobrutóu la “Dama d'Arinteru”.